|
 Vissulega ætti að vera spurningamerki aftast í fyrirsögninni en hún er meira krassandi svona. Eins og margir KR-ingar hef ég nánast allt tímabilið klórað mig til blóðs í hausnum yfir samhljóma lofsöng íslenskra fjölmiðla yfir frammistöðu Bjarna Guðjónssonar í sumar. Aftur og aftur á Bjarni afleita leiki og menn segja hver við annan í stúkunni „hvað ætli hann fái nú mörg m fyrir þetta?“. Iðulega stendur hann svo uppi sem besti maður vallarins að mati fjölmiðlamanna, alveg óháð því hvernig hann stóð sig á vellinum. Eftir leik Hauka og KR í gær var mál manna að Bjarni hefði verið versti leikmaður vallarins og heyrði ég menn sem komu heim af vellinum halda því fram að þetta hafi verið lélegasti leikur Bjarna í sumar. Þrátt fyrir það fékk hann m í Morgunblaðinu.
Ég hef velt þessum stórundarlegu vinnubrögðum fjölmiðlamanna rækilega fyrir mér og hef dottið niður á tvær kenningar, sem ég tel líklegastar. Þá er ekki talin sá möguleiki að ég hafi gengið inn í einhvers konar Vesturbæjarútgáfu af Twilight Zone fyrr í sumar.
Fyrst skal þó tekið fram að Bjarni er, að mér skilst, vel liðin í KR og fyrirmyndar atvinnumaður. Hann hefur staðið sig vel nánast hvar sem hann hefur leikið og átti mjög gott tímabil með KR í fyrra, þegar hann loks fékk að fara á miðjuna. Í sumar hefur hins vegar ekkert gengið upp hjá stráknum. Hann er ekki eins fyrirferðarmikill varnarlega, símissandi boltann og mjög misjafn í föstum leikatriðum. Næst þegar þið sjáið Bjarna spila mæli ég með að þið fylgist með því hvað hann gefur ítrekað krefjandi sendingar á samherja sína. 40 metra sprengjur upp kantinn eru greinilega í miklu uppáhaldi hjá honum en þær heppnast ekki nærri nógu oft til að réttlæta tíðni þeirra. En hvers vegna eru fjölmiðlamenn þá á einu máli (bið þá afsökunar sem ég er ranglega að blanda í þennan hóp, ef einhverjir eru) um að Bjarni sé að rúlla upp deildinni með hverjum frábærum leiknum á fætur öðrum? Hvers vegna er hann t.d. í úrvalsliði Morgunblaðsins sem birt var um daginn? SamsæriskenninginFyrri kenning mín varðandi þetta dularfulla mál er klassísk samsæriskenning. Skv. henni vita menn að Bjarni er að standa sig illa sem kjósa samt sem áður að ljúga að lesendum og segja hann skara fram úr. Kannski á Bjarni marga félaga meðal fjölmiðlamanna sem kunna illa við annað en að hrósa honum. Hverri samsæriskenningu fylgir sú pæling hver hagnist á samsærinu. Bjarni gerir það vissulega og kannski þeir sem fjárfestu í honum. En það verður þó að segjast að samsæriskenningin er ansi langsótt, enda væri um mjög umfangsmikið samsæri að ræða og ég skil ekki beint að menn ættu að nenna að taka þátt í því. Það er þó einn annar vinkill til á Samsæriskenningunni. Það er vitað að KR er ekki beint vinsælasta liðið á landinu og væntanlega er mörgum fjölmiðlamönnum afar illa við þá svarthvítu. Kannski er þetta bara innanhússhúmor í heimi íþróttafréttamennskunnar. Ég sé fyrir mér þá helstu hittast í reykfylltu glansherbergi á Laugardalsvellinum og koma sér saman um að gefa Bjarna Guðjóns alltaf topp einkunn, það væri svo fyndið.
Letikenningin
Hin kenningin tengist leti þeirra sem fjalla um leikina. Það er vissulega auðvelt að henda alltaf flottri einkunn á stærsta nafnið og réttlæta hana með einhverri þvælu ef að er spurt. Þá er hægt að tala um að hann hafi haft góðan talanda, stýrt spilinu vel, leitt sína menn til sigurs eða stigs, ekki gefist upp osfrv., væntanlega alveg óháð því hvort eitthvert þessara atriða hafi átt við, þau bara hljóma sem þokkalegasta útskýring á góðri einkunn. Nú er ég ekki meiri spekúlant en flestir þeirra sem lesa þessa síðu en ég neita að trúa því að þeir sem hafa eitthvað vit á fótbolta geti með pókerfeisi haldið því fram að Bjarni sé að standa sig það vel að hann verðskuldi þessa góðu umfjöllun. Einhver hlýtur þó skýringin að vera. Twilight Zone kenningin og Samsæriskenningin eru nokkuð langsóttar, Letikenningin þykir mér sennilegri. En þegar öllu er á botninn hvolft virðast, af minni reynslu, þeir sem horfa á KR-inga í hverri viku sammála um að Bjarni sé ekki að standa sig vel. Fjölmiðlamenn eru hins vegar á gjörólíkri skoðun og telja hann einn allra besta leikmann deildarinnar og einn bestu manna vallarins í hverjum einasta leik.
|
Greinasafn 
